hemyaan beauty: اهم فرش للعين وطريقة استخدامها

السلام عليكم ورحمة الله وبركاته

اليوم راح نتكلم عن اهم فرش للعين وانواعها وطريقة استخدامها

اول فرشاة راح اذكرها هي اهم فرشاة لازم تكون في متناول كل حد

هاذي الفرشاة المسطحة هي لوضع الايشدو الاساسي اللي راح يكون على كامل الجفن مثل ما هو موضح على الصورة .. دايماً هاذي النوعيه من الفرش تقدر تاخذ كميه كافيه من الايشدو وتخليه متماسك ما يتساقط .

هاذي النوعية من الفرش ( المسطحة ) مثل ما قلنا انها ما تخلي الايشادو يتناثر وتخليه متماسك تستعمل لوظيفه ثانيه

نقدر بهالفرشاه ان نحط ايشادو فيه لمعه وباستخدام الفكس بلس يساعد في توظيح لون الايشادو ويخليه قوي ويظل فترات طويلة ولان الفرشاة مسطحه وضعيفه ف ما راح تتشرب او تاخذ الايشادو بل راح تحط كل الكميه ع العين كل الايشادو اللي كانت ماخذتنه ولهذا السبب هي الافضل لمثل هاذي الامور.

تختلف اشكال الفرش لكن لها نفس الوظيفة

نفس الفرشاتين اللي تشوفونهم في الصوره هي تستخدم لتوزيع الايشادو الاساسي ونفس الوظايف اللي ذكرتها فوق .. لكن تختلف في وظيفة وحدة وهي يمكن ان تتشرب شوي من الايشادو وتخليه واضح لكن مب نفس الفرشاه المسطحه.

ثاني اهم فرشاه وهي فرشاة ( الدمج )

ودايماً فرشاة الدمج تكون بهالشكل لكن ساعات يختلف الحجم والعرض والطول ولكن تظل نفس الوظيفة.

وظيفة فرشاة الدمج: مثل ما هو موضح فالصوره الفرشاه الاولى موضوعه على كسرة العين هني نقدر نحط اللون الانتقالي وهو اللون اللي راح يبرز كسرة العين .. ويفضل ان كل شخص يكون عنده ثنتين من هالفرشاه ليش؟ لان فرشاه راح نحط فيها اللون ويمكن نغير اللون ونزيد في كل مره .. وبعدين نبا ندمج هالالوان لكن لازم الفرشاه تكون نظيفه عسب ما يكون فيها لون يطغي ع لون ثاني ولان الفرشاه الاولى بعد بتم ممزوجه بالوان مختلفه.

الدمج الصحيح يعطيكم لوك حلو ونظيف ( اهم خطوه ).

نوع الفرشاة اللي راح اذكرها الحين تسمى بفرشاة القلم لانها تشبه القلم ومدببه من الاعلى

مثل ما تشوفون في الصوره انا وضحتلكم كيف اقدر استخدمها .. يمكن اني احدد كسرة العين فيها بطريقه دقيقه ومرتبه ودايماً تستخدم لرسم نصف داىره او هلال .. وتستخدم بعد لرسم خط تحت العين او وضع هايلايتر على مدمع العين.

الفرشاه اللي راح اذكرها الحين تسمى angled brush اي ( الزاويه) لانها تشبه زاوية مثلث

وضيفتها بعد رسم هلال ع خارج الجفن وتستخدم بعد لتحديد الايشادو الخارجي وتخليه مستقيم وتستخدم بعد لكسرة الجفن للتدريج.

فرش الايلاينر تختلف بالشكل اما تكون على شكل ( زاويه ) وضعيفه او ان تكون طويله وتشبه القلم

المثلثيه وهي الاسهل في تحديد الرسمه وتسهل رسمه الجناح او خط مستقيم.

الطويله تسوي نفس الوظيفه.

واخيراً الفرشاه المسطحه الصغيره والضعيفه لرسم خط عند الرموش السفليه

لصغر حجمها فهي تسهل وضع الايشادو تحت العين وبالقرب من الرموش السفلية.

مافي قانون يمنع ان تستخدم الفرش لغير وظيفتها الاساسية نقدر نستعملها لاي وظيفه نحن نباها ولكن انا وضحت الطريقه الاساسيه واللي يفضل اتباعها ولا تنسون ان الفرش تسهل وضع الايشادو وتخليه نظيف ومرتب .

راح احط صور الفرش لكن بصوره اوضح